البنت .. كائن انساني .. يعني يؤثر ويتأثر في غيره من بني الانسان ..

صار وتطورت العقول العربية بما مداه شبر ونص .. وصدرت الموافقة على خروج البنت للحياة العامة .. واختلاطها بالبشر .. وتعرفها على العالم بكل ما فيه .. ومن ضمنه اللهجة .. وعملية التأثر والتأثير .. نتج عنها اكتساب لهجات .. و هـ الاكتساب قد يكون بغير قصد ... و اكتساب لهجة بــ يتطلب تطبيقها .. وهيك استخدمت البنت لهجات مختلفة لإيجاد لغة حوار مع غيرها من بني الإنسان .. و .. لا تنسو فرضية تأثيرها بــ غيرها .. و .. إنو يكون هــ الغير استخدم لهجتها ... ولا تنسو برضو انو الرجل بـ تنطبق عليه هـ النظريات

وحدث ذلك كلو .. بــ نفس الأسلوب والغاية والطريقة اللي تأثرت فيها لغتنا العربية باللغة العثمانية والعصملية والفارسية ونتج عن هــ التأثر لهجات جديدة .. يحارب القاصي والداني والكبير والصغير على عدم النطق بها في مجتمعات تجهلها ...

فــ إنو ... اللهجة أو اللغة ... مجرد وسيلة للتحاور وللتعارف وللتفاهم .. من الممكن تجاوزها والاهتمام بقضايا مصيرية أكبر من هيك .. خصوصي وإنو هــ اللهجات بالأصل لا بــ تمثل لا وطنية ولا قومية ولا أصول .. لأنو هي مجرد كلمات دخيلة على اللغة العربية من أصول غير ...

سؤال حلو...

اللي بتكون بالأصل بتحكي باللهجه الاردنيه وفجأه بتغيرها للمدني.. بيكون عندها هي مشكله مش باللهجه الأردنيه الأصيله اللي الكل بيعتز فيها...

يعني مثلاً ... عيلتنا... إحنا الثلاث إخوان الكبار بنحكي غير عن الثلاث الصغار.. لأنو إحنا نولدنا وتربينا في بيئه معينه وأخدنا لهجتهم وبعدين رحلنا على مكان تاني.. والمكان التاني كل اللي فيه أردنيه فإخواني الثلاثه الباقيين بيحكو أردني أردني وما غيرو من لهجتهم..

مع العلم إنا ما بنحكي آل وألنا .. بنحكي قال وقلنا . ^_^

وكل الشكر أخوي الإمبراطور العظيم ^_^

والله احلى سؤال مر علي وانا بسأل نفس السؤال مع انه لهجتنا أردنية واحنا بالأردن القرى والمدن تحكي أردني وكل شي اردني ليش نتصنع مش عارفة؟

على فكرة اخوي الامبراطور لو الموضوع وقف عند البنات والله ما ازعل بس شبابنا صايرين يتمدنو على الآخر " إزا" شب اردني يحكي إزا ليش حرف الذال وين راح ؟


الحمد لله انا مش من هاي الفئة انا بحكي حميدي مادباوي ههههههههههه

مشكوووووووووووووور أخوي عندي حكي كثير بس رح اترك المجال لغيري (^_^)

اولا اشكركن اخواتي ثم انا لي 15سنه في عمان الغربيه واشي يحكي انجليزي واشي يحكي مدني وانا احكي بلهجتي ما تغيرت وبعدين اللغه تكتسب من البيت والام والابهذا رايي الشخصي

القصة مو هيك
انا شخصيا تربيت على اللهجة المدنية يعني لا تصنع ولاشي
المنتدى بضم اشخاص من مختلف الاصول لهيك بتلقى ناس بتحكي اردني وناس بتكحي مدني
اما يللي بالاصل اردني وما بحكي بلهجته فهادة يللي عنده مشكلة وانا براي يللي بستحي من اصله فهو ماعنده اصل وما بيستاهل يكون ابن بلد ولازم الواحد يفتخر بحاله وباصله من وين ماكان يكون يعني مافي فرق بين مدني وبدوي او فلاح

أشكرك أخي الامبراطور
عجبي أن الكثير من بناتناوشبابنا يحاولوا يلبسوا ثوب غيرهم بينما غيرهم لا يقبل التبديل ...

أفخر بلهجتي وربعي وعزوتي ..

بصراحة انا بالنسبة اللي ضد التمدن الزائد لدرجه انه ناسنا تبطل تفهم علينا لكن في بعض كلمات بلهجتنا تحتاج فعلا لتغيير تبعا للزمن اللي احنا فيه...البنات صاروا يختلطوا مع مجتمعات مختلفه ومع بنات جامعيات مش حلو تكون تتكلم بطريقة غريبه لا يفهمها الجميع ....بس حلو التغيير بس بشكل معقول...تحياتي

هو بصراحه مرات في ناس ما يفهم ع كلامي بحس حالي احكي هندي مع انه كلامي مرات يكون لطيف بس يمكن بطلنا نفهم عربي كمان لازم كلمه عربي والباقي انجليزي ونلطش كمن كلمه فرنسي

اسمحولي بــ هــ الكلمة

بـ تضلها اللهجة ضمن نطاق الحرية الشخصية .. الانسان بــ يختار نمط حياته ولهجته واسلوبه الاجتماعي كيف ما حب وأراد ... وما بـ يجوز إنو نفترض وجود مشكلة عند شخص يفترض انو حر بــ اختياراته الحياتية ... ويفترض برضو من باب تقبل الغير إنو ما نسيء للغير ونحلل نفسيات وسلوكيات لمجرد كم كلمة (مدنية) .. حطولي خطين بـ لون احمر تحت هـ الكلمة ...

هلأ .. عرفولي كلمة .. مدنية ..

يا سادة يا كرام ... هــ الكلمة .. اللي لاحظت السخط الشديد عليها ... مرتبطة بــ التمدن .. والتمدن .. يعني .. التحضر .. والتحضر .. يعني التطور .. وبــ التالي .. مدنية يعني متطورة .. معنى هـ الديباجة .. انو

الانسان بــ يتطور .. والتطور إلا ما يصير فيه ... تأثر وتأثير ... وتغييير بـ حال هـ الإنسان المتطور .. اللي كان في بيئة منغلقة .. وصار في بيئة منفتحة على الغير ... ووجب عليه التفاعل معها .. وتحت سياسة لا ضرر ولا ضرار .. ومن باب انو اللهجة لا تؤثر في الفكر الأيدلوجي والأصولي للفرد ... ما كان فيه مشكلة في استخدام اللهجات الأخرى ... ولاحظوا معي ... انو هدف أي لغة بالعالم وأي لهجة في العالم هو إيصال الفكرة .. وما دام وصلت الفكرة .. معناتو اللهجة شو ما كانت (مدنية ولا بدوية ولا قروية) لا تتسم بالعجز وأدت وظيفتها ... ولما تعجز أي منهم عن دورها بـ تصور ما فيه مشكلة في استخدام بديل إلها ...

ولو بدنا نحكي عن أصول هــ اللهجة ... اللي بــ تدافعوا عنها بشراسة واستماتة ... رح تكتشفوا انو هي ما بتمثلنا وبتمثل عروبتنا ...

ونصيحة مني للكل ... اللهجة البيضا .. ما بتشكي من شي وما عليها اعتراضات ... جربوها .. والحلو فيها مفهومة من كل الشعوب العربية ... وانتقادتها معدودة ... فــ إنو جربوها

.... ملاحظة من تحت السطر (^_^)

>>> ما بلاها هاي التقسيمات تبع بنت وشب .. بتصور بـ هاي النقاشات ما إلها تأثير كبير .. والأمر بينطبق ع الجهتين

>>>

أشكرك أخي الإمبراطور على هذا الطرح الجريء
المشكلة أن بناتنا متى ذهبت إلى الجامعة أو حتى خرجت إلى السوق لم تعد تعرفها بسبب الكلام المدني الذي تتكلمه مع أنك إذا شاهدتها في بيتها وجدت كلامها مناقضاً لذلك...
ما عيب لهجتنا حتى نغيرها؟
هل من يتكلمون باللهجة المدنية هم أفضل منا؟
هل تغيير اللهجة عنوان الرقي؟؟؟
كل هذه أسئلة مطروحة أمام الكل وبالأخص أخواتنا الفاضلات راجياً من كل من غير أو يحاول أن يغير لهجته أن يفكر جيداً لأن لهجتنا جزء من هويتنا المميزة لنا

إحنا ما بنحكي قصة مدني أو غير هيك..

إحنا بنحكي عن التصنع بالألفاظ..

يعني مثلاً البنت اللي كانت بتحكي عادي وفجأة مع الجامعه أو الشغل.. (يعني إنو تكون طلعت من بيئتها المحيطه).. فجأة بتلوق لسانها... واللي بيحرج إنها ممكن تغلط وتحكيلها كم كلمه من لهجتها الأصليه..

لكن أخي الإمبراطور... في ناس بيتأثرو بالبيئه المحيطه مش كل الناس واحد...

ومش معنى إنو الواحد ما بيحكي لهجته يعني إنو تخلى عن مبادئه وأصله... بالعكس أنا طفيليه وبعتز وبفتخر إني طفيليه بس والله ما بعرف أحكي طفيلي.. بلطّش أكم من كلمه لكن ما بعرف أحكي طفيلي رسمي... وكتير ناس غيري نفس الإشي...

الغلط مش إنو الواحد ما يحكي لهجته.. الغلط إنو يخجل منها..

سؤال رائع ولكن ؟؟؟؟؟؟
تغيير اللهجه لا يغير اللغه و تبقى مفهومه ...... ولكن ما بالكم بمن يغير اللغه ويخجل من التحدث بها ؟؟؟؟؟؟؟؟؟؟........ أحيانا إستلطاف بعض الألفاظ هو تطور مرغوب بشرط أن لايكون فيه تملق ومبالغه وإستعراض لأن الطبع يغلب التطبع.................

هلاء انا حميدية وبفختر بكلام اهلي كلهم .........لكن احنا عيلتنا اتربنا على الحكي المدني لانو الماما مدنيه وطول عمرنا واحنا اصغار اتربينا عند اخوالي المدن ...........فهاد ما بكون تصنع ......التصنع لما اتكون الوحدة امها حميديه كح وتتمدن .........سبحان الله ما بلبئلها بكون باين التصنع عليها

بالنسبة لي انا مبسوط على الموضوع...
لأن الكثير من الناس شباب او بنات اصبحوا بقلدوا بعض الكلام الذي لا يفهم


انا بحكي حميدي اصلي وبعتز وأفتخر بها ولكن للأسف بعض مصطلحات غير مفهومة .... بعض زملائي لا يفهمونها
يعني مثل _الوهد او الهدوم (وتدل على اللباس)
_المرير (ويدل على العقال)
_الحنفة (وتدل على العصا العكازة)او الباكور بالفلاحي
والكثير من الكلمات الغير مفهومة

اما بالنسبه لي ... اشكر الامبرطور وجميع المعلقين

واقول :
انا بدوي في عيشتي ما تنعمت والقهوة رمز للكيف والسيف محرابي .

التمدن والتحضر والتطور كلها مصطلحات بعيده عن بعضها البعض .

هناك اشي اسمه التصنع واقول لا غبار عليه اذا كان يحكمه الوازع الديني ...سواء شب او بنت يريد ان يتصنع بلهجته اهم شيء انها ما بتاثر على الاخلاق والدين

اما الحضاره مصطلح قوي حيث الحظاره الاسلاميه كانت اهم حضاره ...
هناك ما تتبرج في اللبس بداعي الحضاره او اتمدن او من وجدن بهيك مجتمع او نفس المجتمع
اقول لهن مثل من عندي هاي المره

يعتبروووون قله حيائنا حضاره ..

ههههههههههههههه سؤال حلو والله لما اقعد احكي مع وحدة بتحكي وهي لاوقة لسانها بحاول اجاريها واحكي زيها بس للاسف بخرب الدنيا
هلأ بدي اطيح على الدرج ههههههه
بعد دئيقة بتبدى المحاضرة ههههه
عازمك على تنتاكي(كنتاكي) هههههه
ويعدين بصير مضحكة الي بطلع من ثوبه بتنقل قيمته وانا اكثر اشي بنرفزني بالدنيا انو الوحدة تحكي هيك مع انو والله ما بيكون لابقلها يعني سيماهم في وجوههم
مشكور خيو على السؤال